په عدلیې وزارت کې د قوانینو د څېړنې په منظور ناسته جوړه شوه
د ۱۴۰۰ کال د کب په ۵ مه د پنجشنبې په ورځ، د اسلامي شریعت پربنسټ د تقنیني سندونو د پړاوونو د تېرولو قانون، د معاملو د لارښوونې قانون او د امارت د قضایاوو قانون د څېړنې په منظور، په عدلیې وزارت کې ناسته جوړه شوه.
په دې ناسته کې، د افغانستان اسلامي امارت د عدلیې وزارت سرپرست مولوي عبدالحکیم شرعي، هغو جیدو علمای کرامو چې د قوانینو د طرحې د پروژې په چوکاټ کې موْظف شوي او د عدلیې وزارت د قانون جوړونې د چارو د انستیتوت یو شمېر مسوولینو ګډون کړی وو.
په دې ناسته کې د عدلیې وزارت سرپرست وویل چې موږ حکومت د شریعت د ټینګښت په خاطر غواړو او شریعت د حکومت په خاطر نه غواړو. نوموړي همداراز وویل موږ قوانین په داسې ډول جوړه وو چې له اسلامي شریعت سره په ټکر کې نه وي.
د عدلیې وزارت سرپرست څرګنده کړه چې عالیقدر امیر الموْمنین د یوه هدایت په ترڅ کې ټولو ادارو ته لارښوونه کړې چې خپل اړوند قوانین د اسلامي شریعت پربنسټ وڅېړي او هغه حکمونه چې له اسلامي شریعت سره په ټکر کې په ګوته کړي، نوټ دې کړي او وروسته دې د پړاوونو د تېرولو په منظور د عدلیې وزارت ته وړاندې کړي.
ددې قوانینو دڅېړنې دپاره دعلماؤ، شیوخو اوقانون پوهانو یو بورډ جوړ شوي چې هغوی روزانه د قوانینو څېړنې کوي.
نوموړي د قوانینو د طرحې په پروژه کې موْظفو علماء کرامو ته سپارښتنه وکړه چې د قوانینو په څېړنه کې ځیرکتیا او چټکتیا په پام کې ونیسي څو په ډېر لنډ وخت کې قوانین و څېړل شي او د راتلونکو پړاوونو د تېرولو په غرض واکمنو مراجعو ته وړاندې شي.
