په جوزجان ولایت کې د ۵۷۵ جریبه ځمکې بررسي کېدل
د جوزجان ولایت د ځمکو له غصب څخه د مخنیوي تخنیکي هیئت ناسته د رجب المرجب د میاشتې په ۱۱ مه نېټه، د یکشنبې په ورځ، د دغه هیئت د رئیس او غړو په ګډون جوړه شوه.
په دې ناسته کې، د جوزجان ولایت د مرکز اړوند په شورجر افغانيه کلي کې د پنځه سوه پنځه څلوېښت (۵۴۵) جریبه ځمکې او د قرقين ولسوالۍ په جوی سرای کلي کې د دېرش (۳۰) جریبه ځمکو دوسیو په اړه بحث او خبرې وشوې.
تخنیکي هیئت پرېکړه وکړه چې د یادو ځمکو دوسیې دې بشپړې شي او د هغو په هکله دې املاکي څېړنې ترسره شي.
همدارنګه، په یاده ناسته کې د جوزجان ولایت په کچه د ځمکو د غصب اړوند یو شمېر نورې دوسیې هم تر بحث او بررسۍ لاندې ونیول شوې او په اړه یې لازم تصامیم ونیول شول.
