عدلیې وزارت د ۵ خیریه بنسټونو، اتحادیو او شوراګانو دفترونه د غیرقانوني فعالیتونه په دلیل وتړل
د اسلامي امارت، عدلیې وزارت د ټولنو او ټولنیزو بنسټونو نظارتي پلاوي د تېرو دوو میاشتو په اوږدو کې ۳۴ ټولنې چې خیریه بنسټونه او اتحادیې پکښې شاملې دي، په کابل ښار کې نظارت او بررسي کړل چې په پایله کې د یادو ټولنو ۵ دفترونه د غیرقانوني فعالیت په دلیل وتړل شول.
دا بررسۍ د ۱۴۰۳ هـ.ل کال د زمري او وږي په میاشتو کې ترسره شوې او په ترڅ کې یې د ۱۸ اتحادیو، ۱۵ خیریه بنسټونو او یوې شورا فعالیتونه نظارت او د یاد هېئت لهخوا وارزول شول چې له دې جملې څخه درې خیریه بنسټونه، یوه اتحادیه او یوه شورا د رسمي جواز نهلرلو، د جواز د مودې پای ته رسېدلو او یو لړ سرغړونو په دلیل وتړل شول.
د څارنې پلاوي د دغو خیریه بنسټونو او اتحادیو متصدیانو ته توصیه وکړه چې د افغانستان اسلامي امارت له اصولو او پالیسۍ سره سم فعالیت وکړي او دغه راز له هغوی څخه یې وغوښتل چې په خپلوخت د خپلو فعالیتونو راپور د ټولنو او ټولنیزو بنسټونو ریاست ته وړاندې کړي.
د عدليې وزارت د ټولنو او ټولنيزو بنسټونو د چارو رياست نظارتي پلاوی په دوامداره توګه د اتحادیو او خیریه بنسټونو له فعالیت څخه بررسي او نظارت ترسره کوي تر څو د غیرقانوني فعالیتونو مخنیوی وکړي.
