د عدلیې وزارت د حقوقي مرستو ریاست او د کابل ولایت د استيناف محکمې ترمنځ د همغږۍ ناسته جوړه شوه
د عدلیې وزارت د حقوقي مرستو رئيس، محترم مفتي ضياء الحق ثاقب او ورسره مل پلاوي د کابل ولایت د استيناف محمکې رئيس، محترم مفتي ذبیح الله ساجد سره په یوې ناسته کې د دواړو ادارو ترمنځ پر لازیاتي همغږۍ ټینګار وکړ.
په دې ناسته کې د عدلیې وزارت د حقوقي مرستو رئيس د یاد رياست د دندو په اړه معلومات وړاندې کړل او ویېویل چې دغه رياست په جزایي قضيو کې بېوزلو زیانمنو، تورنو او شکمنو او کورنيو قضيو کې ښځو او ماشومانو ته وړيا حقوقي مرستې او مشورې وړاندې کوي. همداراز نوموړي ټولو هېوادوالو لپاره د یاد ریاست لخوا د وړیا حقوقي مشورو وړاندې کولو ته هم اشاره وکړه.
نوموړي په خپلو خبرو کې د حقوقي مساعدینو یو شمېر ستونزې د استیناف محکمې له رئیس سره شریکې کړې او د حل په برخه کې یې د همکارۍ غوښتنه وکړه.
په ورته مهال د استيناف محکمې رئيس له حقوقي مساعدینو سره د همغږۍ او په محکمو کې د هغوی د ستونزو د لرې کولو ډاډ ورکړ.
