د کندهار ولایت د عدليې ریاست اداري ناسته جوړه شوه
د کندهار ولایت د عدليې ریاست اداري ناسته د ۱۴۴۴ هجري قمري کال د شعبان میاشت په ۱۳ نېټه د یکشنبې په ورځ د کندهار ولایت د عدليې رئیس او ددغه ریاست د آمرینو، مدیرانو او کارکوونکو په ګډون سره جوړه شوه.
دغه ناسته د کلام الله مجید د څو آیاتونو په تلاوت سره پیل شوه او د عدليې رئیس په کې د انسان د پیدایښت، د انسان مړینې، د ژوند ارزښت، په ژوند کې د نیکو عملونو ترسره کولو او له مرګ څخه وروسته د ژوندې کیدلو په اړه خبرې وکړې او د مخکنۍ ناستې موضوعات تعقیب شول او اړوندو آمریتونو د خپلو اجراآتو راپور وړاندې کړ.
په یاده ناسته کې، د ځینو مهمو موضوعاتو په اړه لکه، ددغه ولایت ولسوالیو کې د معاملو لارښوونو، موټر پلورنځیو او اتحادیو له پاره د جواز ویشل او د هغوی له کارونو څخه د نظارت، د امارت د قضایاو د آمریت اړوند دوسیو بررسۍ او تعقیب، د حقوقو د آمریت د لیږد، د حقوقي مرستو د آمریت اړوندو چارو د تنظیم، د کلني راپور د ترتیب، له آمرینو څخه د اطاعت، آمریتونو کې د شته ستونزو او نورو اړوندو موضوعاتو په اړه بحث او خبرې وشوې او دغو برخو کې لازم تصمیمونه ونیول شول. دغه ناسته د دعا په ویلو سره پای ته ورسیدله.
