د کابل شهزاده سرای د صرافانو د اتحادیې رئیس د ټاکنو پروسې په ترڅ کې وټاکل شو
د کابل شهزاده سرای د صرافانو د اتحادیې د رئیس ټاکلو په منظور د ټاکنو پروسه د ربیع الاول د میاشتې په ۶ نېټې د پنجشنبې په ورځ د عدلیې وزارت تر نظارت لاندې په شفاف ډول ترسره شوه. د یادو ټاکنو په پایله کې حاجي بهرام ځدران د شهزاده سرای له صرافانو څخه یو تن، د ۱۳۵ رایو په ترلاسه کولو سره د یادې اتحادیې د رئیس په توګه وټاکل شو.
په دغې پروسې کې د شهزاده سرای رسمي جواز درلودونکو ۲۳۶ تنو صرافانو د رایې ورکوونکو په توګه برخه اخیستې وه او د عدلیې وزارت، د افغانستان بانک، د استخباراتو او یو شمېر نورو ادارو استازو هم د ناظر په توګه حضور درلود.
په یادې برنامې کې د صنعت او سوداګرۍ وزارت سرپرست، د عدلیې وزارت د انسجام لوی رئیس، د یاد وزارت د جمعیتونو رئیس او د سوداګرۍ او پانګونې اتاق رئیس او یو شمېر نورو مقاماتو هم حضور درلود.
د عدلیې وزارت د انسجام لوی رئیس مولوي عبدالصمد عمري په دغې برنامې کې وویل چې د یادې اتحادیې د نوي رئیس د تعیین بهیر کابو ۹ میاشتې وخت ونیو او نن ورځ په بریالیتوب سره پای ته ورسید. نوموړي په خپلو ویناو کې د هیواد په اقتصاد او آبادۍ کې د صرافانو او خصوصي سکتور رول اړین وباله او د هغوی د توجو غوښتونکی شو.
د شهزاده سرای د صرافانو د اتحادیې نوي رئیس حاجي بهرام ځدران هم له عدلیې وزارت او په ځانګړي توګه د یاد وزارت له سرپرست شیخ الحدیث مولوي عبدالحکیم شرعي څخه د یادې اتحادیې د ټاکنو لپاره د زمینې برابرولو په منظور د مننې ترڅنګ، ژمنه وکړه چې د بهرنیو پیسو پر وړاندې د افغانۍ د ارزښت لوړولو په برخه کې لازیاتې هڅې کوي.
په دغو ټاکنو کې د حاجي بهرام ځدران سربېره، حاجي دادګل حضرت زي ځان د یادې اتحادیې ریاست لپاره نوماند کړی وو. نوموړي په خپلو وینا کې د یادې اتحادیې نوي رئیس ته د مبارکۍ ترڅنګ ژمنه وکړه چې له نوموړي سره هر راز همکارۍ ته چمتو دی.
په دغې برنامې کې د سوداګرۍ او پانګونۍ اتاق رئیس محمد یونس مهمند او نورو مقاماتو هم د موضوع په تړاو خبرې وکړې او هیلي یې څرګندې کړې چې د شهزاده سرای د صرافانو د اتحادیې د ټاکنو د حل موضوع، د هیواد پر اقتصاد او په هیواد کې د پیسو د ګرځیدلو پر بهیر مثبته اغیزه وکړي.
