د ښار ګوټو، دمعاملو د لارښوونو د دفترونو او موټر پلورنځیو د سندونو په اړه د عدلیې وزارت خبرتیا
د ښارګوټو، معاملو د لارښوونو د دفترونو او د موټر پلورنځیو ټولو مسؤولانو ته خبر ورکول کېږي چې د ښارګوټو، معاملو د لارښوونو د دفترونو او د موټر پلورنځیو د سندونو د راټولولو او بررسۍ لپاره د عدلیې وزارت غځول شوی مهلت سبا (یکشنبه د لړم په ۳۰ نېټه) پای ته رسېږي.
پر دې اساس د دې اصنافو له ټولو مالکانو او مسؤولانو څخه غوښتنه کېږي ترڅو ورڅخه غوښتل شوي سندونه د یکشنبې ورځې تر پایه پورې د عدلیې وزارت او نورو اړوندو ادارو په اختیار کې ورکړي تر څو تر بررسۍ لاندې ونیول شي. هغه افراد او اشخاص چې په دې چاره کې تعلل کوي بیا د شکایت حق نلري. همدارنګه د معاملو هغه دفترونه چې د هغو د فعالیت د جواز نېټه پای ته رسېدلې او یا په غیر قانوني ډول فعالیت کوي د یکشنبې تر پایه پورې له خپل شته سندونو سره د عدلیې وزارت ته مراجعه وکړي.
همدارنګه په کابل کې د معاملو د لارښوونو له ټولو دفترونو څخه غوښتنه کېږي چې د ۱۴۰۰ کال د لیندۍ ۱ نېټې له دوشنبې ورځې د سهار له ۸ بجو څخه د ورځې تر پایه پورې خپل دفترونه پرانیستې وساتي ترڅو د عدلیې وزارت مؤظف هیئت د دغو دفترونو له فعالیتونو څخه څارنه وکړي. د معاملو د لارښوونو هغه دفترونه چې د مؤظف هیئت د حضور په وخت کې تړلې وي، د عدلیې وزارت له لوري د هغو د بندېدو او د فعالیت د جواز د سلبولو په صورت کې د شکایت حق نلري.
