د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر، د کمېسیون رئیس او د اراضۍ او د امارتي ځمکو د استرداد وزارت وارسي کوونکی محترم شیخ الحدیث مولوي عبدالحکیم شرعي په مشرۍ په یوې ناسته کې د هېواد په څلورو ولایتونو کې د څه باندې ۸ زرو جریبو ځمکو موضوعات تر بحث او بررسۍ لاندې ونیول.
په دې ناسته کې چې د جمادی الأولی د میاشتې په ۱۱مه نېټه د یکشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي نجیب الله حقاني، د چارو ادارې عمومي رئیس محترم شیخ الحدیث مولوي نورالحق انور، د سترې محکمې استازي محترم مولوي محمد حماد، د کرنې وزارت د اراضۍ رئیس محترم مولوي محمود مظلوم، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون رهبرۍ د کمېسیون او اختصاصي محکمې د پرېکړو د تطبیق لپاره د ځانګړې امنیتي قطعې د رامنځته کولو، د کمېسیون او اختصاصي محکمو د فیصلو د تطبیق طرزالعمل د موادو د اجرا، په غور ولایت کې د عامه څړځایونو د تثبیت او د هېواد په درېیو ولایتونو کې د څه باندې ۲۴ زره جریبه ځمکو موضوعاتو په اړه بحث او خبرې وکړې.
په یاده ناسته کې پرېکړه وشوه چې د ځانګړې امنیتي قطعې د رامنځته کولو په برخه کې لازم اقدامات ترسره شي او همدارنګه پر هغو ځمکو چې په تړاو یې فیصله شوې «د کمېسیون او اختصاصي محکمو د فیصلو د تطبیق طرزالعمل» د موادو د طبیق څرنګوالی بررسي شوو.
دغه راز د کمېسیون رهبرۍ په هرات، هلمند او بلخ ولایتونو کې د څه باندې ۲۴ زرو جریبو ځمکو په اړه هم لازم تصمیم ونیو او لارښوونه یې وکړه، په هغو مواردو کې چې ایجاب کوي، لازیات معلومات او سندونه راټول کړل شي.
