د پکتیا ولایت له تخنیکي هیئت سره د عدليې وزارت د سرپرست کتنه
د اسلامي امارت د عدليې وزارت سرپرست او د ځمکو د غصب د مخنیوي کمېسیون رئیس شیخ الحدیث مولوي عبدالحکیم شرعي د ۱۴۴۴ هجري قمري کال د شعبان میاشت په ۱۲ نېټه د شنبې په ورځ پکتیا ولایت ته سفر وکړ او د ځمکو د غصب د مخنیوي له تخنیکي هیئت، د والي له مرستیال او ددغه ولایت له نورو سیمه ییزو مقاماتو سره وکتل او خبرې یې وکړي.
دغه ناسته چې د پکتیا ولایت د څارنوالۍ په ریاست کې جوړه شوې وه، د کلام الله مجید د څو آیاتونو په تلاوت سره پیل شوه او په ترڅ کې یې د عدليې وزارت سرپرست د ځمکو د غصب د مخنیوي کمېسیون د دندو، مسوولیتونو، د فعالیتونو او اجراآتو په برخه کې د ستونزو او ننګوونو په اړه معلومات وړاندې کړل.
نوموړي وویل چې د ځمکې د غصب مخنیوی هغه وخت شونی دی چې اړونده ادارې او امارتي ارګانونه په خپلو کې همغږي ولري او په چارو کې روابطو او خپلويو ته نه بلکې ضوابط او د افغانستان د اسلامي امارت قوانینو او مقررو تطبیق ته لومړیتوب او اهمیت ورکړي.
د عدليې وزیر د پکتیا ولایت د تخنیکي هیئت غړو ته ډاډ ورکړ چې په هر راز سختیو او ستونزو کې به له دغه هیئت سره هر اړخیزه همکاري وکړي.
د یادې ناستې په لړ کې د تخنیکي هیئت غړو هم خبرې وکړي او ددغه هیئت د اجراآتو، ستونزو او ننګونو په اړه معلومات وړاندې کړل.
