د پکتیا ولایت د عدلیې ریاست او د دغه ولایت د استخباراتو ریاست ترمنځ د همغږۍ ناسته جوړیدل
د پکتیا ولایت د عدلیې رئیس مولوي محمد رئیس محمدي د ربیع الثاني د میاشتې په ۲ نېټې د سه شنبې په ورځ د حقوقي مساعدتونو وړاندې کولو په برخه کې د لا زیاتې همغږۍ په منظور د یاد ولایت د استخباراتو ریاست له مرستیال سره وکتل او خبرې ورسره وکړې.
په دغې ناسته کې چې د پکتیا ولایت د استخباراتو په ریاست کې ترسره شوه، د عدلیې ریاست د حقوقي مساعدتونو آمر او حقوقي مساعدینو او د استخباراتو د ریاست یو شمېر مسؤلینو برخه واخیسته.
په دغې ناسته کې د عدلیې رئیس د حقوقي مساعدتونو د آمریت د فعالیتونو او په جزايي موضوعاتو کې بې وزله شکمنو او تورنو ته د با کیفیته خدمتونو وړاندې کولو د څرنګوالي او په مدني موضوعاتو کې د بې وزله ماشومانو او ښځو له شرعي او قانوني حقوقو څخه د دفاع په اړه معلومات ورکړل او دغه ریاست ته د استخباراتو د ریاست له لارې د بې وزله شکمنو او تورنو په معرفي کولو یې ټینګار وکړ.
د استخباراتو د ریاست مرستیال په دغې برخه کې د همکارۍ ژمنه وکړه او هم یې اړوندو مسؤلینو ته لارښوونه وکړه چې د عدالت د تامین او د بې وزله شکمنو او تورنو د حقوقو د رعایت په منظور په شرایطو برابرو تورنو ته د عدلیې له ریاست څخه د حقوقي مساعد غوښتنه وکړی.
