د پنجشیر او کاپیسا عدلیې ریاستونو کارکوونکو لپاره زده کړه ییزه برنامه جوړه شوه
د عدلیې وزارت د کارکوونکو چارو ریاست د پنجشیر او کاپیسا ولایتونو د عدلیې ریاستونو کارکوونکو لپاره د «مسلکي او اداري زده کړې» تر سرلیک لاندې شپږ ورځنۍ زده کړه ییزه برنامه جوړه کړه.
د یادې زده کړه ییزې برنامې پرانیسته کې چې د محرم الحرام ۲۳ مه نېټه د شنبې په ورځ، د پنجشیر ولایت د عدلیې رياست په مقر کې جوړه شوه، د یاد ولایت د عدلیې رئیس، د عدلیې وزارت د کارکوونکود چارو د ریاست د زده کړو او ظرفیت لوړولو آمریت ښوونکو او یو شمېر نورو مسؤولینو ګډون درلود.
په دې زده کړه ییزه برنامه کې چې تر شپږو ورځو پورې به دوام ولري، د کاپیسا او پنجشير ولایتونو د عدلیې ریاست ۲۵ تنو مسلکي کارکوونکو ته د دعوا لیکنې، دفاعیې لیکنې، راپور او مکتوب لیکنې د څرنګوالي او د مفاهمې او اړیکو مدیریت په اړه زده کړې ورکړل شي.
د عدلیې وزارت د کارکوونکو د چارو ریاست د کارمندانو د ظرفیت لوړولو په موخه په منظم ډول زده کړه ییزې برنامې جوړوي ترڅو خلکو لپاره د خدمتونو وړاندې کولو د لاپیاوړتیا لامل شي.
