د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکي هیئت ناسته د ذوالقعدې د میاشتې په ۱۷ نېټه د سه شنبې په ورځ د دغه هیئت د رئیس او غړو په حضور سره جوړه شوه او د یاد هیئت رئیس د ننګرهار والي په مشرۍ د ختیځ زون په کچه د غونډې په اړه معلومات ورکړل، ویې ویل چې نوموړي په دغې ناسته وړانديز وکړ چې د امنیه قوماندانۍ مسؤلین د غاصبینو په جلب کې له تخنیکي هیئت سره همکاري وکړي.
یاد شوي هیئت د قرغه یي ولسوالۍ په نهر کریم ساحه کې د امارتي ځمکو له متصرفینو سره وکتل او له هغوی څخه یې سندونه وغوښتل. دغه راز یاد شوي هیئت د علینګار ولسوالۍ د ټک کلا په ساحه کې او د مرکز په ملک افضل ساحه کې د امارتي ځمکو له متصرفینو سره په جلا توګه وکتل او له هغوی څخه یې قانوني سندونه وغوښتل او له هغوی څخه ژمنه هم واخیسته چې نور امارتي ځمکي نه تصرف کوي.