د فراه ولایت د تخنیکي هیئت ناسته جوړه شوه
د فراه ولایت د ځمکو د غصب د مخنیوي د تخنیکي هیئت ناسته ددغه هیئت د رئیس او غړو په حضور سره جوړه شوه او د یو لړ موضوعاتو په اړه لازم تصمیمونه ونیول شول.
هیئت د ګلستان ولسوالۍ په چکاو ساحه کې د افرادو او اشخاصو تصرف لاندې د امارتي ځمکو په اړه پریکړه وکړه چې په راتلونکو ورځو کې د ساحې څخه له نږدې لیدنه وکړي. په قلعه کاه ولسوالۍ کې د اشخاصو د شخړې په اړه هم پریکړه وشوه چې هیئت په راتلونکې کې ساحې ته ولاړ شي.
هیئت د فراه مرکز اړوند یو اندازه ځمکه چې د اشخاصو لخوا پېرل شوې او اوس امارتي تثبیت شوې له هغوی څخه راوګرځوله او پر هغوی یې ټینګار وکړ چې له هغه لوري سره دعوا وکړي چې ځمکه یې پر تاسو پلورلې ده. دغه ځمکه د کرنې ریاست د څیړنیز فارم اړوند ده.
په یاده ناسته کې هیئت د فراه مرکز اړوند د جوي ګوت غلامان په ساحه کې د شخړي لوري وغوښتل ترڅو د هغوی موضوع حل کړي. یو شمېر اشخاص هم د هیئت راتلونکې غونډې ته وغوښتل شول.
