د غزني ولایت کې د ګذر وکيلانو او د معاملاتو لارښوونې له استازو سره د کورونو د کرایې د کنټرول کمېټې د همغږۍ ناسته جوړیدل
په غزني ولایت کې د کورونو د کرایې د کنټرول ګډې کمېټې د ربیع الاول د مياشتې په ۲۸مه نېټه د یکشنبې په ورځ د دغه ولایت د بېلابېلو ناحیو د ګذر له یو شمېر وکيلانو او د معاملاتو لارښوونې دفترونو له استازو سره د همغږۍ ناسته جوړه کړه.
دا ناسته د غزني ولایت د عدلیې رئیس مولوي مطیع الحق عثمان په مشرۍ جوړه شوه او نوموړي په خپلو خبرو کې له ګاونډي هېوادونو څخه د کډوالو راستنېدو او د خلکو اقتصادي وضعیت ته په اشارې ټینګار وکړ چې د دغه ولایت په کچه د کورونو کرایې باید راکمې شي.
نوموړي وویل چې د کورونو د کرایې له څرنګوالي څخه د څار پروسه به په دې ولایت کې په جدې توګه دوام ولري او ټینګار یې وکړ چې د معاملاتو لارښوونې دفترونه دې له رسمي سټو ګټه پورته کړي او د سپینو او غیر رسمي سټو د کارولو په صورت کې به له سرغړونکو سره قانوني چلند وشي.
په ورته مهال د ګذر وکيلانو او د معاملاتو لارښوونې استازو هم خپلې موجودې ستونزې په ناسته کې مطرح کړې او له ګډې کمېټې سره یې د همکارۍ ډاډ څرکند کړ.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
