د عریضه لیکنې د فعالیت د جواز له یو شمېر غوښتونکو څخه آزموینه واخیستل شوه
د عدليې وزارت د انسجام لوی ریاست د معاملاتو د لارښوونې او عریضه لیکونکو ریاست د خپلو مخکنیو ارزونو په دوام، د صفرالمظفر د میاشتې په ۲۶ نېټې د سه شنبې په ورځ د عریضه لیکنې د فعالیت د جواز له یو شمېر غوښتونکو څخه د ارزونې او د آزموینې اخیستلو برنامه د دغه وزارت په مقر کې جوړه کړه.
په دغې برنامې کې د عدليې وزارت د انسجام لوی رئیس مولوي حافظ عبدالصمد عمري، د معاملاتو د لارښوونې او د عریضه لیکونکو رئیس مولوي سکندر یحيی عابد او د دغه ریاست نورو مسؤلینو د آزموینې له بهیر څخه څارنه ترسره کړه. په دغې آزموینه کې د عریضه لیکنې د فعالیت د جواز ۴۰ تنو غوښتونکو برخه اخیستې وه.
عدلیې وزارت وړ کسانو ته د عریضه لیکنې د فعالیت جواز د ویشلو په منظور، وخت په وخت د عریضه لیکنې د جواز له غوښتونکو څخه په یاد وزارت کې آزموینه اخلي ترڅو وړ او با استعداده کسان په اصولي او شفاف ډول وټاکي او د خلکو په کارونو کې د آسانتیاو د رامنځته کیدلو سبب شي.
