د عدلیې وزارت عمومي ناسته د دې وزارت د سرپرست په مشرۍ جوړه شوه
د اسلامي امارت د عدلیې وزارت سرپرست شیخ الحدیث مولوی عبدالحکیم شرعي، د ۱۴۰۱ د وري ۶ مه د شنبې په ورځ د دې وزارت د مرکزي رئیسانو او آمرینو په ګډون د وزارت عمومي ناسته جوړه کړه.
په دې ناسته کې شیخ صاحب قندهار ولایت ته د خپل سفر پایلې، په هغه ولایت کې د کابینې فوق العاده ناسته او د دې وزارت مسوولینو ته د چارو د ښو اجراء کولو لپاره د عالیقدر امیر الموْمنین شیخ الحدیث والتفسیر هبت الله اخندزاده صاحب توصیې وړاندې کړې.
هغه وویل عالیقدر امیرالموْمنین ټینګار وکړ چې په ادارو کې کار او خلکو ته د خدمتونو د وړاندې کولو بهیر باید چټک شي او هم دې د عدلیې وزارت له شریعت سره سم د قوانینو د برابرولو په برخه کې ګام واخلي. همداراز نوموړي عدلیې وزارت ته لارښوونه کړی تر څو د ادارو د ورځنیو چارو د اجراء کولو لپاره قوانین جوړ شي او همداراز شته قوانین دې له شریعت سره سم عیار شي.
شیخ صاحب د عالیقدر امیرالموْمنین خبرو ته په اشارې د ادارو د تشکیل په برخه کې او دا چې تشکیل باید له ضرورت سره سم وي، څرګنده کړه چې ډېر ژر به د عدلیې وزارت د تشکیل د بیا کتنې او څېړنې کار پیل شي او په ادارو کې به د هر شخص مسوولیت مشخص شي.
د عدلیې وزارت سرپرست د نن ورځې په ناسته کې د وزارت رئیسانو او نورو کارکوونکو ته توصیه وکړه تر څو خپلې دروازې د خلکو پرمخ پرانیستی وساتي او د الله ج د رضا په خاطر له خلکو سره ښه چلند او سلوک وکړي.
