د عدلیې وزارت د مدرسة العدالة د حدیثو له لويې دورې څخه د شپږو تنو فراغت
د عدلیې وزارت د مدرسة العدالة د حدیثو د لويې دورې د فاضلانو د دستاربندي او فراغت مراسم د شعبان د میاشتې په ۲۶ نېټه د سهشنبې په ورځ د فاضلانو او د عدليې وزارت د مقاماتو او مسؤولینو په ګډون د ياد وزارت په مقر کې ترسره شول.
په دغو مراسمو کې د عدلیې وزارت مسلکي معین، محترم شیخ الحدیث مولوي عبدالکریم حیدر، مالي او اداري رئيس، محترم شیخ الحدیث مولوي سید حبیب الحبیب، د قانون جوړونې د چارو د عمومي ریاست مرستیال، محترم شیخ الحدیث مولوي رکن الدین عتیق، د دعوت او ارشاد رئیس، محترم مولوي سعیدالرحمن سعید او نورو رئیسانو او مسؤولینو حضور درلود او ویناوې یې وکړې.
په دغو مراسمو کې شیخ الحدیث مولوي سید حبیب الحبیب د موضوع په تړاو خبرې وکړې او فاضلانو ته یې د دغې دورې د فراغت مبارکي ورکړه او هغوی لپاره یې د لازیاتو بریاوو هیله وکړه. نوموړي د وخت او ورڅخه د ګټې اخیستو لپاره د موخو پر ټاکلو ټینګار وکړ او ویې ویل چې فاضلان دې د دورې له بشپړولو څخه وروسته هم مطالعه وکړي او ملت ته د خدمت او د خپل علمي ظرفیت پراختیا لپاره دې هڅې وکړي.
د قانون جوړونې د عمومي ریاست مرستیال هم په دغو مراسمو کې د تعلیم او د دیني علومو د تعلم په اړه خبرې وکړې او د شریعت د بقا ضامن یې وباله. هغه زیاته کړه چې الله تعالی انسان اشرف المخلوقات پیدا کړی او د دغې ځانګړتیا دلیل هم د دیني علومو تعلیم او تعلم دی.
هغه زیاته کړه چې د بېلابېلو څانګو او د اړتیا وړ علومو زده کړې یوه جدي اړتیا ده، خو دا زده کړې باید په اسلامي تفکر سره وړاندې شي ترڅو د تعلیمي مرکزونو فارغان د شریعت پر ضد ونهروزل شي. هغه وویل چې اسلامي امارت دا موضوع درک کړې او په مدرسو، ښوونځیو او پوهنتونونو کې د درسي نصاب د بیاکتنې په هکله کار کوي.
په یادو مراسمو کې د عدلیې وزارت مسلکي معین، محترم شیخ الحدیث مولوي عبدالکریم حیدر د صحیح البخاري کتاب په اړه معلومات وړاندې کړل او د بخاري شریف ختم یې ترسره کړ.
د حدیثو شریف په دې لویه دوره کې چې د عدليې وزارت د دعوت او ارشاد رياست له لورې ترسره شوې وه او ۹ مياشتې يې دوام وکړ، شپږ تنو ګډون درلود چې د نن ورځې په مراسمو کې پر سرونو یې د فضیلت دستارونه کېښودل شول.
