د عدلیې وزارت د مدافع وکیلانو رئیس د ننګرهار ولایت له یو شمېر مدافع وکیلانو سره وکتل او خبرې وکړې
د عدلیې وزارت د مدافع وکيلانو رئيس، محترم مولوي جان محمد محمد طلحه په مشرۍ یو پلاوي، ننګرهار ولایت ته د سفر پر مهال د دغه ولایت له یو شمېر مدافع وکيلانو سره د ننګرهار د عدلیې ریاست په مقر کې د همغږۍ ناسته ترسره کړه.
په دې ناسته کې د ننګرهار د عدلیې رئيس، محترم مولوي محمد رئيس محمدي او یو شمېر نورو مسؤلینو هم ګډون درلود. په یاده ناسته کې د عدلیې وزارت د مدافع وکيلانو رئیس په خپلو خبرو کې مدافع وکيلان د نظام مهمه برخه وبلله او ویې ویل چې ياد وکيلان د عدالت ستنې، د مظلومانو غږ او د قضاء معنوي مرستندویان دي. نوموړي ډاډ ورکړ چې د عدلیې وزارت د مدافع وکیلانو ریاست د مدافع وکيلانو د ستونزو د حل په موخه له اړوندو ادارو سره د همغږۍ ناستې ترسره کوي او دا ستونزې به یې حل کړي.
ورپسې د ننګرهار د عدلیې رئيس هم په دې ناسته کې د مدافع وکيلانو رول مهم وباله او توصیه یې وکړه چې یاد وکیلان دې په پوره صداقت سره خپل مسلکي مسؤولیتونه د قانون او اصولو په رڼا کې ترسره کړي. هغه ټینګار وکړ چې د عدلیې ریاست ژمن دی ترڅو د مدافع وکيلانو ستونزو ته رسېدګي وکړي او د هغوی په کار کې د آسانتیاوو رامنځته کولو په برخه کې لازمې هڅې کوي.
له بلې خوا، مدافع وکيلانو هم په دې ناسته کې ډاډ ورکړ چې خپل فعالیتونه او کاري چارې د اسلامي شریعت او نافذه قوانینو مطابق، په امانتدارۍ او اخلاص سره پر مخ وړي.
