د عدلیې وزارت د دوو مرکزي رياستونو د رئيسانو معرفي کېدل
د عدلیې وازرت د قانون جوړونې عمومي رئيس مفتي فضل هادي صاحبزاده د یو لړ مراسمو په ترڅ کې د یاد وزارت د دوو مرکزي ریاستونو رئیسان چې، د یاد وزارت د وړاندیز او د ریاست الوزرا د عالي مقام د منظورۍ په اساس تعیین شوي دي، د یادو ریاستونو کارمندانو ته وروپېژندل.
په دغه مراسمو کې چې د قانون جوړونې عمومي رئيس مفتي فضل هادي صاحبزاد، د حقوقي مرستو رئيس او د بشري سرچينو اوسنۍ سپرست مفتي احمد ضيا خبیب، د مالی او اداري رئيس مولوي سید حبیب الحبیب او د يادو رياستونو نورو مسؤولینو درلود، د ذوالحجې د میاشتې په ۱ نېټه د شنبې په ورځ ترسره شو، په ترڅ کې یې مفتي امين الله وافی د قانون جوړونې عمومي رياست د خصوصي سکتور او سوداګرۍ قوانینو ديپارتمنت رئيس په توګه او همدارنګه مولوي سعيد الرحمن سعيد د عدلیي وزارت د دعوت او ارشاد رئیس په توګه معرفي شول.
په دغو مراسمو کې د عدلیې وزارت د قانون جوړونې عمومي رئیس مفتي فضل هادي صاحبزاده د خپلو خبرو په ترڅ کې، یادو رئيسانو ته د نویو مسؤليتونو د مبارکې ترڅنګ زیاته کړه چې نوې دندې د الله تعالی له لوري یوه ازموينه وي او په دې ازموينه کې د بریا راز په اخلاص او د شریعت په رڼا کې د اداري چارو ترسره کول دي.
همدارنګه د عدلیي وزارت د حقوقي مرستو رئيس او د بشري سرچينو رياست سرپرست مفتي احمد ضیا خبیب په یادو مراسمو کې نوي رئيسانو ته د هغو په چارو کې د لا زياتو برياليتوبونو هيله څرګنده کړه.
