د عدليې وزارت د مرکزي رئیسانو د اداري ناستې جوړیدل
د عدليې وزارت د مرکزي رئیسانو اداري ناسته د ۱۴۴۴ هجري قمري کال د شعبان میاشت په ۲ نېټه د چهارشنبې په ورځ د مسلکي معین شیخ الحدیث مولوي عبدالکریم حیدر په مشرۍ او عدليې وزارت د مالي او اداري معین، مرکزي رئیسانو او مسوولینو په ګډون ددغه وزارت په مقر کې جوړه شوه.
په دغې ناسته کې، د حقوقو د لوی ریاست له کارکوونکو څخه د هویت کارتونو او اسلحې کارتونو د راټولولو، د مرکزي ریاستونو ترمنځ د همکارۍ، له محکمو سره د حقوقي مرستندویانو د ستونزې، د حقوقي مرستو د ریاست د تشکیل، وزارت کې د رسمیاتو پای ته رسیدلو پورې د رئیسانو د حضور او پر قوانینو او مقررو د کار د څرنګوالي په اړه بحث او د نظر تبادله وشوه.
په یاده ناسته کې، د حقوقو د لوی ریاست له کارکوونکو څخه د هویت کارتونو او اسلحې کارتونو د راټولولو په اړه پریکړه وشوه چې سترې محکمې ته لیک واستول شي ترڅو د حقوقو د لوی ریاست له کارکوونکو څخه د هویت کارتونه او د اسلحې کارتونه راټول او عدليې ریاست ته یې وسپاري. د حقوقو لوی ریاست مخکې له عدليې وزارت څخه جلا شوی او د سترې محکمې تر چتر لاندې دي.
دغه راز په دغې ناسته کې د مرکزي ریاستونو ترمنځ د همکارۍ په اړه پریکړه وشوه چې د ځینو موضوعاتو د استعجالیت له پاره باید په لیکل شوي ډول ضمانت واخیستل شي او اړوند کار ترسره شي.
په همدې توګه یاده ناسته کې له محکمو سره د حقوقي مرستندویانو د ستونزې په اړه بحث او پریکړه وشوه چې موجوده ستونزې په ګوته او لیست کړل شي او اړونده عالي شورا کې مطرح شي ترڅو هغو ته رسیدګي وشي.
د حقوقي مرستندویانو د ریاست د تشکیل په اړه مالي او اداري معین، د بشري سرچینو رئیس او د حقوقي مرستندویانو رئیس ته دنده وسپارل شوه ترڅو ددغه ریاست پر تشکیل کار وکړي. دغه راز پریکړه وشوه چې ددغه وزارت رئیسان د اړتیا او دندې پریښودلو پر مهال د عدليې وزیر په نشتون کې له اړوندو معینانو څخه اجازه واخلي.
په یاده ناسته کې ددغه وزارت د ښوونې، فرهنګي او روغتیايې قوانینو دیپارتمنت رئیس ته دنده وسپارل شوه ترڅو د بشپړ شويو قوانینو او مقررو راپور ترتیب او د عدليې وزارت مقام ته یې وړاندې کړي.
