د شمال زون ولایتونو د عدلیې ریاستونو مسلکي غړو لپاره د شپږ ورځني زده کړییز سیمینار جوړول
د عدلیې وزارت د بشري سرچینو ریاست د زده کړو او ظرفیت لوړولو آمریت، د ربیع الثاني د میاشتې په ۱۳ نېټې د شنبې په ورځ د شمال زون ولایتونو د عدلیې ریاستونو مسلکي غړو لپاره شپږ ورځنی زده کړییز سیمینار د بلخ ولایت د عدلیې ریاست د زده کړو په تالار کې جوړ کړ.
په دغه سیمینار کې چې د امارت د قضایاو د مسلکي د زدکړو تر سرلیک لاندې جوړ شوی د بلخ، سرپل، فاریاب، جوزجان، او سمنګان ولایتونو د عدليې ریاستونو ۳۱ تنو مسلکي غړو برخه واخیسته او د غصب او له هغه سره د مبارزې د حل لارو، د ځمکو د غصب د مخنیوي مقررې او اړوند لایحې، دعوا او د هغې شرایط، د برنامې جوړیدلو او د ادارې د انسجام په چارو کې د اداري مراسلاتو د اهمیت په اړه لازمې زده کړې ترسره کوي.
د یاد سیمینار په پرانیسته کې د بلخ ولایت د امارت د قضایاو آمر او د عدلیې ریاست سرپرست مولوي غلام رسول متقي د دغه سیمینار له ترسره کونکو څخه مننه او قدرداني څرګنده کړه او په راتلونکي کې هم د دغه راز برنامو جوړولو غوښتنه وکړه.
د عدلیې وزارت د بشري سرچینو ریاست د زده کړو او ظرفیت لوړولو آمریت د یاد وزارت د کارمندانو د کاري ظرفیت لوړولو په منظور وخت په وخت دغه ډول برنامې جوړوي او د یاد وزارت د کارمندانو د ظرفیت لوړولو په موخه هلې ځلې کوي.
