د اسلامي همکارۍ د سازمان له یوه هیأت سره د عدليې د وزیر کتنه
دافغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعي د روان هجري قمري کال د ذوالقعدې د میاشتې په ۲۲ نېټه د سه شنبې په ورځ د اسلامي فقهې د بین المللي اکاډمي د عمومي سرمنشي داکتر کوتوب مصطفی سانو په مشرۍ د اسلامي همکارۍ د سازمان د غړو هیوادونو د عالمانو په ګډون له یوه هیأت سره د دې وزارت په مقر کې وکتل او خبرې یې ورسره وکړې.
دغه هیأت د اسلامي همکارۍ د سازمان په استازیتوب افغانستان ته راغلی دی چې د اسلامي امارت له مقاماتو او عالمانو سره په دین کې د حجاب او د نجونو د زدکړې په ګډون د ډیرو مهمو موضوعګانو په باره کې خبرې وکړي.
دغه هیأت لومړی د اسلامي همکارۍ د سازمان په باره کې دعدلیې وزیر ته معلومات ورکړل. دغه راز د هغې سولې له امله چې به افغانستان کې تأمین شوې ده خوښي څرګنده کړه او په دغه هیواد کې یې د ثبات د دوام هیله وکړه.
په دې کتنه کې د نجونو د تعلیم او د حجاب د رعایتولو په باره کې خبرې وشوې. د عدليې وزیر د افغانستان اقتصادي وضعیت او ستونزو باره کې معلومات ورکړل او د اسلامي عالمانو هیأت ته یې ډاډ ورکړ چې د افغانستان اسلامي امارت د اسلامي شریعت په چوکاټ کې د نجونو د تعلیم پلوی دی.
ده وویل همدا اوس هم ښونځي او مدرسې فعالې دي خو د اقتصادي ستونزو له امله نشو کولای چې د نجونو له پاره جلا ښونځي او مدرسې جوړې کړو ځکه چې امریکا د افغانستان پانګه بنده کړې ده او په هیواد کې بانکي فعالیتونه ځنډېلي دي.
د عدلیې وزیر ټینګار وکړ چې د اقتصادي ستونزو په اساس زیات کارونه ځنډېدلي دي. هغه زیاته کړه که چیرې د افغانستان اسلامي امارت په رسمیت وپېژندل شي زیاتره اوسنۍ ستونزې حل کیږي او افغانستان به په بیلابیلو برخو کې پرمختګ وکړي. دغه راز هغه وویل چې د اسلامي هیوادونو له پاره هیڅ عذر شتون نه لري چې اسلامي امارت په رسمیت و نه پېژني.
په پای کې د اسلامي عالمانو هیأت ژمنه وکړه چې خپل دولت ته په افغانستان کې د تأمین شوي سولې او امینت ډاډ ورکوي او له هغوی څخه به وغواړي چې له اسلامي امارت سره دوستانه اړیکې ټینګې کړي.
