د تېرو کلونو په پرتله د کورونو د کرایې د زیاتولو د ممنوعیت په اړه د عدلیې وزارت خبرتیا
د اسلامي امارت د عدليې وزارت له دې وړاندې د هېواد په کچه د کورونو ټولو مالکانو او د معاملاتو لارښوونې د دفترونو متصدیانو ته خبر ورکړی و، چې سږکال له ګاونډیو هېوادونو څخه د هېوادوالو د راستنېدو له امله د تېرو کلونو په پرتله د کورونو د کرایې د زیاتولو حق نهلري او د دغه کار د ترسره کولو په صورت کې به له قانوني تعقیب سره مخ شي.
خو له دې سره، د کابل ښار له بېلابېلو ناحیو څخه د جایدادونو مالکانو او د معاملاتو لارښوونې جواز لرونکو لخوا د کورونو د کرایو په بېسارې ډول زیاتولو په اړه، دې وزارت ته ګڼ شمېر شکایتونه رسېدلي دي او په ډاګه کوي چې د کرایې دغه ډول زیات اخیستلو، خلک او راستنېدونکي له ډېرو ستونزو سره مخ کړي دي.
له همدې امله، د عدليې وزارت یو ځل بیا د جایدادونو ټولو مالکانو او د معاملاتو لارښوونې د فعالیت جواز لرونکو ته خبر ورکوي چې د کورونو د کرایې له زیاتولو څخه ډډه وکړي، له تېرو کلونو سره سم کرایه واخلي او د هېوادوالو پر وړاندې خپل ایماني او وجداني مسئولیت ادا کړي، له دې پرته به له سرغړوونکو سره جدي قانوني او شرعي چلند وشي او د شکایت حق به ونهلري.
د کور د کرایې له زیاتوالي سره د مخامخ کېدو په صورت کې هېوادوال کولای شي خپل لیکل شوی شکایت په مرکز کې د عدلیې وزارت د انسجام عمومي ریاست او په ولایتونو کې د عدلیې ریاستونو ته وړاندې کړي ترڅو دغه وزارت، سرغړونکي د قانوني تعقیب په موخه اړوندو ارګانونو ته معرفي کړي.
