د ښځو او ماشومانو د ځورونې او اذیت د منع قانون د ۶ دولتي ادارو د کارکوونکو لپاره تشریح شول
د عدليې وزارت د ۶ وزارتونو او دولتي ادارو د حقوقي برخو د کارکوونکو لپاره د تقنیني سندونو د تشریح د زده کړه ییزې برنامې درېیم پړاو جوړ کړ.
دغه برنامه د روان کال د لړم د میاشتې په ۱۰ نېټه په شنبې ورځ د عدليې وزارت د قانون جوړونې او د علمي ـ حقوقي څېړنو د چارو د انستیتیوت له لوري او د آلمان د پرمختیايې همکاریو د ادارې (GIZ) د قانون له واکمنۍ څخه د ملاتړ د پروژې په مالي همکارۍ جوړه شوه.
په دې زده کړه ییزه برنامه کې د ښځو د چارو او د مهاجرینو او راستنیدونکو د چارو د وزارتونو، د احصايې او معلوماتو د ملي ادارې، د افغاني سرې میاشتې د ټولنې او د بدني روزنې ورزش د لوی ریاست او د کوچیانو د چارو د سمون لوی ریاست د حقوقي برخو ۳۲ تنو کارکوونکو ګډون وکړ.
د تقنیني سندونو د پړاوونو د تیرولو قانون او د ښځو او ماشومانو د ځورونې او اذیت د منع قانون له هغو تقنیني سندونو څخه و چې د دې برنامه د عدليې وزارت د قانون جوړونې انستیتیوت د کارپوهانو له لوري تشریح شول.
دغه راز د تقنیني سندونو د لومړنۍ طرحې د تسوید او برابرولو د بهیر او د دغو سندونو له زیاتو تعدیلونو څخه د مخنیوي لپاره د رعایت وړ معیارونو په باب په دې برنامه کې خبرې وشوې.
ټاکل شوې ده د نورو وزارتونو او دولتي ادارو د حقوقي برخو د کارکوونکو لپاره د دغو زده کړه ییزو برنامو جوړول دوام ومومي.
