د ځمکو د غصب د مخنیوي او غصب شوو ځمکو د استرداد کمېسیون فوق العاده ناسته جوړه شوه
د ځمکو د غصب د مخنیوي او غصب شوو ځمکو د استرداد د کمېسیون فوق العاده ناسته د جمادي الاول میاشت په ۱۹ نېټه د سه شنبې په ورځ د عدليې وزارت سرپرست او ددغه کمېسیون د رییس شیخ الحدیث مولوي عبدالحکیم شرعي په مشرۍ او د یاد کمېسیون د غړو چې د کار او ټولنیزو چارو د وزارت سرپرست، د ښار او کور جوړولو وزارت سرپرست، د کرنې وزارت معین او د لوی څارنوالۍ استازی په کې شامل دي او ددغه کمېسیون د اختصاصي محکمې غړي او د چارو د ادارې لوی رییس او د سترې محکمې د دارالانشا د رییس په ګډون جوړه شوه.
دغه ناسته، د کلام الله مجید د آیاتونو په تلاوت سره پیل شوه او په اجنډا کې د شاملو موضوعاتو په اړه په کې بحث او د نظرونو تبادله وشوه.
په دغې ناسته کې د هرات، نیمروز، فراه، غور او بادغیس ولایتونو د تخنیکي هیئتونو له پاره د سیمينار جوړولو په اړه بحث وشو او پریکړه وشوه چې د راتلونکې چهارشنبې په ورځ یاد سیمینار جوړ شي. د کابل ولایت د شکردرې خلکو ته د هدیرې جوړولو له پاره د ۷ جریبه ځمکې د ورکولو او د لوګر ولایت ښوونې ریاست ته په کنجنک کلي کې د مدرسې جوړولو له پاره د ۵ جریبه ځمکې د ورکولو په اړه بحث وشو او پریکړه وشوه چې دغه موضوع د چارو ادارې ته واستول شي ترڅو په دغې برخه کې د امیرالمومنین حفظه الله لارښوونه واخیستل شي او یا هم اړوند مراجعو ته په دغې برخه کې صلاحیت ورکړل شي.
دغه راز په دغې ناسته کې د شنې ساحې ۱۴۰۰ متر مربع ځمکې په اړه چې مارکېټ پرې جوړ شوی او د هغې په اړه د زابل ولایت د عدليې ریاست لخوا استردادي قرار صادر شوی، بحث وشو او پریکړه وشوه چې د ۱۶۱ ګڼې مکتوب پر اساس د زابل ولایت تخنیکي هیئت ته لارښوونه ورکړل شي چې هیڅ څوک نشي کولای په یاد مارکېټ کې مالکانه تصرف وکړي. دغه راز پریکړه وشوه چې یاد مارکېټ پرانېستل شي او د هغه عواید د یاد ولایت د ښاروالۍ په حساب کې ټول شي ترڅو اختصاصي محکمه په دغې برخه کې د شریعت پر بنسټ تصمیم ونیسي.
دغه راز د هغو موضوعاتو په اړه چې مخکني حکومت کې په محکمو کې دوسیه لري او اوس کمېسیون ته راجع شوي، پریکړه وشوه چې په دغې برخه کې د سترې محکمې د حکم پر اساس تصمیم ونیول شي او دغه راز د کمېسیون لخوا د ځمکې د بررسۍ او استرداد له پاره د اندازې د تعیین په اړه، تصمیم پر دې شو چې په مضوعاتو کې د کمیت او کیفیت له لحاظه د کمېسیون له رییس سره مشوره وشي.
په ولسوالیو کې د تخنیکي کمېټو د جوړولو په اړه هم پریکړه وشوه چې په ولسواليو کې له ادارو او اشخاصو څخه د همکار په توګه استفاده وشي او ولسوالیو کې تخنیکي ټیمونه رامنځ ته نه شي.
