د عدلیې وزارت د حقوقي مرستو ریاست او د بغلان ولایت د والي ترمنځ د همغږۍ ناسته جوړیدل
د عدلیې وزارت د حقوقي مرستو رئيس مولوي جان محمد «محمد طلحه» او ورسره مل پلاوي، د جمادیالثانی د مياشتې په ۲۹مه نېټه د شنبې په ورځ د بغلان والي مولوي عبدالرحمن حقاني او د استيناف محکمې رئیس مولوي شمس الدين عزیزي سره د همغږۍ ناسته جوړه کړه.
په دې ناسته کې چې د بغلان ولایت په مقام کې ترسره شوه، د عدلیې وزارت د حقوقي مرستو رئيس د وړيا حقوقي مرستو او مشورو د وړاندې کولو څرنګوالي، په جزایي قضيو کې حقوقي مرستو ته د بېوزلو زیانمنو، تورنو او شکمنو د لاسرسۍ، د مرکز او ولایتو په کچه په وړيا ډول د ۱۸۸ شمېرې له لارې حقوقي مشورې ورکول، په عدلي او قضائي مراجعو کې د حقوقي مساعدینو د کاري ستونزو او یو شمېر نورو موضوعاتو په اړه خبرې وکړې او مسؤولينو سره یې لازم معلومات شریک کړل.
په دې ناسته کې د بغلان ولایت والي او نورو مسؤولينو ډاد ورکړ چې د حقوقي مرستو د ترلاسه کولو په موخه د عدلیې رياست د حقوقي مرستو آمریت ته د بيوزلو زیانمنو، تورنو او شکمنو کسانو ورپېژندلو او حقوقي مساعدینو سره په قضايي ناستو کې د ګډون او دغه راز د هغوی د مؤکلينو په دوسیو کې لازمه همکاري کوي.
