په هرات ولایت کې د معاملاتو لارښوونې ۳ دفترونو د غير قانوني فعاليت له امله وتړل شول
د هرات ولایت د عدليې ریاست نظارتي پلاوي، په روانه اونۍ کې د دغه ولایت مرکز اړوند په اوومه ناحيه کې د معاملاتو لارښوونې له ۳۷ دفترونو څخه نظارت ترسره کړ.
مؤظف نظارتي پلاوي د یادو دفترونو د فعالیت جوازونه، د ثبت کتابونه، د پېر او پلور قانونيتوب، رسمي سټې او یو شمېر نور اړين اسناد بررسي کړل چې په ترڅ کې یې ۳ دفترونه د غير قانوني فعاليت له امله وتړل شول.
نظارتي پلاوي د پاتې نورو دفترونو پر متصديانو ټینګار وکړ چې یاد دفترونه دې خپل ټول فعالیتونه د اصولو مطابق ترسره کړي او د غير قانوني فعاليتونو څخه دې ډډه وکړي.
د یادونې ده چې د هرات عدلیې رياست په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
