په سرپل ولایت کې د معاملاتو لارښوونې ۲ دفترونو د غير قانوني فعاليت له امله وتړل شول
د سرپل ولایت د عدليې ریاست نظارتي پلاوي، د ربیعالآخر د مياشتې په ۲۶ مه او ۲۷ مه نېټه د یکشنبې او دوشنبې په ورځو د یاد ولایت په کچه د معاملاتو لارښوونې له ۱۳ دفترونو څخه نظارت ترسره کړ.
مؤظف نظارتي پلاوي د یادو دفترونو د فعالیت جوازونه، د ثبت کتابونه، د پېر او پلور قانونيتوب، رسمي سټې او یو شمېر نور اړين اسناد بررسي کړل او په پایله کې یې د معاملاتو لارښوونې ۲ دفترونه د غير قانوني فعالیت له امله وتړل.
پلاوي د دغه نظارت په ترڅ کې د پاتې نورو دفترونو یو شمېر نيمګړتياوې او ستونزې هم مشخصې کړې او د یادو ستونزو د لرې کولو او د کاري چارو ښه پرمخ وړلو په موخه یې د هغو متصدیانو ته لازمې توصیې وکړې.
د یادونې ده چې د سرپل عدلیې رياست په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
