د عدلیې وزارت د مدافع وکیلانو د رياست نوی رئيس معرفي شو
د عدلیې وزارت د کارکوونکو د چارو رئيس، محترم مفتي رحمت الله حليم د یوې غونډې په ترڅ کې د یاد وزارت د مدافع وکیلانو د رياست نوی رئيس چې د عدلیې وزارت د وړاندیز او د رياست الوزرا د عالي مقام د منظورۍ په اساس تعيين شوی دی، د یاد رياست کارمندانو ته وروپېژنده.
په دې غونډه کې چې د صفر المظفر د مياشتې په ۶مه نېټه د پنجشنبې په ورځ د عدليې وزارت د بېلابېلو برخو رئیسانو او مسؤولینو په ګډون جوړه شوه، محترم مولوي عبدالرحیم احسان د دغه وزارت د مدافع وکیلانو رياست د نوي رئیس په توګه معرفي شو.
په دې غونډه کې د عدليې وزارت د کارکوونکو د چارو رئیس، د مدافع وکیلانو د نوي رئیس د موقف د مبارکۍ تر څنګ، په امارتي ادارو کې د مسؤولینو تقرر، بدلون او تبدیل یو اصل وباله او د مسؤولیتونو پر صادقانه توګه د ترسره کولو او خلکو ته پر رېښتني ډول خدمت کولو یې ټینګار وکړ.
د عدلیې وزارت د مدافع وکیلانو نوی رئیس د حدیثو له لویې دورې فارغ شوی او تر دې وړاندې یې د خوست ولایت د شهیدانو او معلولینو چارو د رئیس په توګه دنده ترسره کړې ده.
