د نیمروز د عدلیې ریاست د جایدادونو د کرایو له زیاتوالي څخه د مخنیوي په موخه یوه غونډه ترسره کړه
د نیمروز ولایت د عدلیې ریاست د جایدادونو د کرایو له زیاتوالي څخه د مخنیوي او په قانوني ډول د معاملاتو ترسره کولو په موخه د معاملاتو لارښوونې اتحادیې د مسؤولینو او د استخباراتو، امنیې قوماندانۍ استازو او د دې ولایت د ګذر وکیلانو په ګډون یوه ناسته جوړه کړه.
دا غونډه د محرم الحرام د میاشتې په ۲۶مه نېټه د سهشنبې په ورځ، د نیمروز ولایت د عدلیې رئیس، مولوي عبدالوارث خلیل په مشرۍ د یاد ریاست په مقر کې ترسره شوه او د کډوالو د ستونزو په ځانګړي ډول د کورونو د کرایو د لوړالي او د سرغړونو د مخنیوي په موخه د معاملاتو د تنظیم په اړه پهکې بحث او خبرې وشوې.
په دې غونډه کې پرېکړه وشوه چې د نیمروز ولایت په کچه دې ټول معاملات د معاملاتو لارښوونې د دفترونو له لارې ترسره شي او د ګذر وکیلان دې په دې برخه کې همکاري وکړي.
همداراز، د معاملاتو لارښوونې اتحادیه مؤظفه شوه چې د اړوندو نهادونو په همکارۍ، په دې ولایت کې د معاملاتو له بهیر څخه په دقیق ډول څارنه ترسره کړي او د کرایو له لوړوالي څخه دې مخنیوی وکړي. په ناسته کې پرېکړه وشوه چې د سرغړونو د مشاهدې په صورت کې دې د عدلیې ریاست، استخبارات او امنیه قومانداني د سرغړونکو پر وړاندې قانوني اقدامات ترسره کړي.
