په بلخ ولایت کې له يو شمېر دارالوکالو څخه نظارت ترسره شو
د شمال زون د مدافع وکيلانو آمريت نظارتي پلاوي د ذوالقعدې د میاشتې په ۱۴مه نېټه د دوشنبې په ورځ د دغه ولایت د مرکز، مزار شریف ښار په پنځمه ناحيه کې، له ۲۱ دارالوکالو څخه نظارت ترسره کړ او د هغو فعالیتونه یې بررسي کړل.
نظارتي پلاوي د دغه نظارت په ترڅ کې د یادو دارالوکالو دفترونه، جوازلیکونه، د ثبت کتابونه، لوحې او نور سندونه بررسي کړل.
د یاد نظارت په ترڅ کې یوه دارالوکاله چې په غيرقانوني بڼه یې فعاليت ترسره کاوه مهرلاک شوه او د پاتې نورو دارالوکالو متصديانو ته توصیه وشوه چې په خپلو کاري چارو کې شته ستونزې حل کړي.
همدارنګه، د دغه نظارت په ترڅ کې مدافع وکيلانو خپل یو شمېر کاري ستونزې له نظارتي پلاوي سره شريکې کړې او د هغو د حل غوښتونکي شول چې د حل په برخه کې یې ډاډ ورکړل شو.
