په غور ولایت کې د ۷۴۹۹ جریبه امارتي ځمکې تشخيص
د غور ولايت د ځمکو له غصب څخه د مخنيوي تخنیکي هيئت ناسته د روژې د مياشتې په ۲۳ مه نېټه د یکشنبې په ورځ، د یاد هيئت د رئیس او غړو په ګډون جوړه شوه.
د تخنيکي هيئت په دې ناسته کې د یاد ولایت د مرکز ولسوالۍ اړوند په لقک سفيدک او حصارسم کلیو کې د اووه زره څلور سوه نهه نوي (۷۴۹۹) جریبه ځمکې دوسیه تر بحث او بررسي لاندې ونيوله او په ترڅ کې یاده ځمکه امارتي تشخيص کړه.
هيئت پرېکړه وکړه چې د یادې ځمکې دوسیه دې د وروستۍ پرېکړې په موخه مرکزي کمېسيون ته واستول شي.
همدارنګه په دې ناسته کې د غور ولایت په بېلابېلو ساحو کې د غصب شويو ځمکو اړوند یو شمېر نورې دوسیې هم بررسي شوې او په اړه یې لازم تصاميم ونيول شول.
