په کندز ولایت کې د څه باندې ۱۰۰ جریبه امارتي ځمکې استرداد
د کندز ولایت د ځمکو له غصب څخه د مخنیوي تخنیکي هيئت ناسته، د جمادی الأولی د مياشتې په ۲۳ مه نېټه د دوشنبې په ورځ، د تخنیکي هيئت د رئيس او غړو په ګډون جوړه شوه.
په دې ناسته کې تخنيکي هيئت، د ياد ولایت د مرکز اړوند په عسقلان ساحه کې یوسل او شپږ (۱۰۶) جریبه او په امير حاتم کلي کې یو جریب ځمکه تر بررسۍ لاندې ونیوله او د دغو ځمکو د متصرفينو د اعتراف په اساس یې استرداد او د ځمکو په بانک کې د ثبت په موخه د کرنې رياست ته تسليم کړه.
همدارنګه په دې ناسته کې د آقتاش ولسوالۍ اړوند په لودين ساحه کې د دېرش (۳۰) جریبه ځمکې په اړه بحث وشو او په ترڅ کې دغه ساحه امارتي تثبيت او تشخيص شوه، همداراز یو هيئت مؤظف شو چې د یادې ساحې راپور پشپړ او په راتلونکې ناسته کې یې تخنيکي هیئت ته وړاندې کړي.
