په سمنګان کې څه باندې ۶۶۱۴ جریبه ځمکه امارتي تثبیت شوه
د سمنګان ولایت د ځمکو له غصب څخه د مخنیوي تخنیکي هیئت د یاد ولایت په خُلم ولسوالۍ کې د ۱۷ زره او ۳۶۰ جریبه ځمکې په بررسۍ سره، د هغې څه باندې شپږزره او شپږسوه او څوارلس (۶۶۱۴) جریبه ځمکه امارتي تثبیت کړه.
د دغې اندازې ځمکې بررسۍ لپاره په خُلم ولسوالۍ کې موظف پلاوي خپل کاري راپور، د تخنیکي هیئت په ناسته کې چې د ربیعالثاني د میاشتې په ۱۷مه نېټه د یکشنبې ورځ جوړه شوه، وړاندې کړ چې، پر بنسټ یې د یادې ځمکې ۶۶۱۴.۷۶ جریبه امارتي تثبیت شوې ده.
دا ځمکې د سمنګان ولایت په کل اریغ او نوکر اریغ ساحو کې موقعیت لري او تخنیکي هیئت پرېکړه وکړه چې په دې تړاو دې لازیاتې څېړنې او بررسۍ ترسره شي او راپور یې مرکزي کمېسیون ته واستول شي.
په دې ناسته کې د حضرت سلطان ولسوالۍ په چقمقلي کلي کې د دوهزره (۲۰۰۰) جریبه ځمکې موضوع هم بحث لاندې ونیول شوه او پرېکړه وشوه چې یو پلاوی دې له یادې ځمکې لیدنه وکړي، تفکیک او تشخیص یې کړي.
