په بلخ ولایت کې د کابو ۲ زره جریبه ځمکې بررسي کېدل
د بلخ ولایت د ځمکو له غصب څخه د مخنیوي تخنیکي هیئت ناسته، د ربیعالاول د مياشتې په ۲۲ مه نېټه د چهارشنبې په ورځ، د دغه هیئت د رئیس او غړو په ګډون ترسره شوه.
د تخنیکي هيئت په دې ناسته کې، د یاد ولایت د دهدادي ولسوالۍ په پشت باغ کلي کې، د ابوريحان البيروني پروژې اړوند شپږ سوه شل (۶۲۰) جریبه ځمکې، د مزار شریف د حيرتان په دو راهي کې د راه ابرشیم پروژې اړوند د زر (۱۰۰۰) جریبه ځمکې، د مزار شریف په شادیان دښته کې د سل (۱۰۰) جریبه ځمکې او د بلخ ولایت په بېلابېلو برخو کې د ځمکو د غصب اړوند یو شمېر دوسیې تر بحث او بررسۍ لاندې ونيول شوې.
هیئت پرېکړه وکړه چې د یادو دوسیو په اړه دې څېړنې او بررسۍ بشپړې شي او د وروستۍ پرېکړې په موخه دې مرکزي کمېسيون ته واستول شي.
