په میدان وردک ولایت کې د زورواکو جایدادونه مشخص کیږي
د میدان وردک ولایت د ځمکو د غصب د مخنیوي تخنیکي هیئت په یوې ناسته کې پریکړه وکړه چې د زورواکو اشخاصو جایدادونه د یاد ولایت په کچه مشخص شي او له هغو څخه ترلاسه شوي عواید یو حساب ته ولیږدول شي.
یاده ناسته د کب د میاشتې په ۲۰ نېټه د یکشنبې په ورځ جوړه شوه او د یاد ولایت په کچه د زورواکو د جایدادونو، د سردار محمد داوودخان ښارګوټي د هستوګنې د ۲۲۲ نمرو او په نرخ، چک او سیدآباد ولسوالیو کې د بررسۍ لاندې ساحو د ساتنې موضوع په اړه هم بحث او د نظرونو تبادله ترسره شوه.
هیئت پریکړه وکړه چې د یاد ولایت په مرکز کې د سردار محمد داوودخان ښارګوټي د هستوګنې نمرو اداري کارونه پیل شي او دغه راز په دریو ولسوالیو کې د بررسۍ لاندې ساحو د ساتنې په برخه کې، د یادو ولسوالیو له مسؤولینو سره همغږي وشي.
