د لغمان ولایت د ځمکو د غصب د مخنیوي تخنیکي هیئت د یاد ولایت له نوي والي سره وکتل
د لغمان ولایت د ځمکو د غصب د مخنيوي تخنيکي هئيت د یاد ولایت له نوي والي شيخ شير احمد حقاني سره د ولايت د مقام په مقر کې وکتل.
په دې کتنه کې چې د شعبان د میاشتې په ۲۲ مه نېټه د یکشنبې په ورځ ترسره شوه تخنيکي هئیت د خپلو فعاليتونو په اړه د لغمان والي ته معلومات وړاندې کړل. په ورته مهال د لغمان نوي والي د دغه هئيت کړنې وستایلې او په دې برخه کې د هر اړخیزې همکارۍ ډاډ ورکړ.
دغه راز تخنیکي هئيت په خپلې نوبتي ناسته کې چې په همدې ورځ جوړه شوه، د یاد ولایت د مرکز په مهترلام ښار کې د دعوا لاندې ځمکې په بررسۍ سره ۱۸ بسوې امارتي ځمکه چې د مهاجرينو ښارګوټي اړوند وه، تثبیت او تشخيص کړه. تخنيکي هئيت د دعوا له لورو څخه وغوښتل چې په ياده ځمکه کې له نويو تصرفاتو او عمراناتو څخه دډه وکړي.
