د بادغیس د عدلیي ریاست کارمندانو لپاره زده کړه ییزه برنامه جوړول
د عدلیې وزارت د بشري سرچینو ریاست د بادغیس ولایت د عدلیې ریاست کارمندانو لپاره «د امارت د قضایاو مسلکي او اداري زده کړې» تر سرلیک لاندې شپږ ورځنۍ زده کړه ییزه برنامه د یاد ریاست په مقر کې جوړه کړه.
د یادې زده کړه ییزې برنامې پرانیسته کې چې د شعبان د میاشتې په ۱۳ نېټه د شنبې په ورځ جوړه شوه، د بادغیس ولایت د عدلیې رئیس ملا عبدالرزاق مرزوقي، د عدلیې وزارت د بشري سرچینو ریاست د زده کړو او ظرفیت لوړولو آمر مفتي احمد ضیا خبیب، ښوونکو او نورو مسؤولینو حضور درلود.
د بادغیس ولایت د عدلیې رئیس د خپلې وینا په ترڅ کې، د ادارې مسلکي کولو په برخه کې د دغه راز برنامو جوړول مهم وبلل او خلکو ته د غوره خدماتو په وړاندې کولو او د اسلامي امارت د کارمندانو په امانت دارۍ یې ټینګار وکړ.
له بلې خوا د عدلیې وزارت د بشري سرچینو ریاست د زده کړو او ظرفیت لوړولو آمر هم په دې برنامه کې د زده کړه ییزو برنامو د اغیزمنتوب، ګټورتوب او اهمیت په تړاو خبرې وکړې. نوموړي له ګډونوالو څخه وغوښتل چې د دغې برنامې زده کړې په دوامداره توګه تعقیب کړي او د برنامې له پای څخه وروسته، په خپلو کاري چارو کې ورځني ګټه پورته کړي.
په دې زده کړه ییزې برنامه کې چې تر شپږو ورځو پورې دوام لري، د بادغیس ولایت د عدلیې ریاست ۲۰ تنو مسلکي کارمندانو لپاره د ځمکو له غصب سره د مبارزې د حل لارو، د ځمکو د غصب د مخنیوي قانون، دعوا او د هغې ډولونو، اداري مرسلاتو او پلان جوړونې په هکله به لازمې زده کړې وړاندې شي.
