د پکتیا د عدلیې رئیس د یاد ولایت د معاملاتو لارښوونو د دفترونو له مسؤولینو سره وکتل
د پکتیا ولایت د عدلیې رئیس مولوي محمد رئیس محمدي د شعبان د میاشتې په ۷ نېټه د یکشنبې په ورځ د یاد ولایت د معاملاتو لارښوونو او موټرپلورنځیو د دفترونو له مسؤولینو سره وکتل او خبرې ورسره وکړې.
په دې کتنه کې د پکتیا د عدلیې رئیس د معاملاتو لارښوونو دفترونو په برخه کې د موجودو ستونزو، د یادو دفترونو شرعي او قانوني مسؤولیتونو او د قانون له حکمونو څخه د پیروۍ په تړاو خبرې وکړې او هغوی ته یې لازمې توصیې وکړې.
دغه راز نوموړي د معاملاتو لارښوونو دفترونو مسؤولینو ته د ځمکو د غصب د مخنیوي او د غصب شویو ځمکو د استرداد کمېسیون لارښوونو په اړه معلومات ورکړل او له هغوی څخه یې وغوښتل چې د ځمکو د پېر او پلور په وخت له زیات دقت څخه کار واخلي ترڅو پر اشخاصو باندې امارتي ځمکې و نه پلورل شي.
نوموړي په ښارګوټو کې د پېر او پلور په اړه هم لارښوونه وکړه چې د یادو دفترونو مسؤولین، په هغو ښارګوټو کې د پېر او پلور معاملات ترسره کړي چې د محاکمو یا کمېسیون قطعي پریکړه له ځان سره ولري چې د هغو په ګټه صادر شوي وي.
د عدلیې رئیس د معاملاتو لارښوونو دفترونو ته د یوې اتحادیې جوړولو وړاندیز هم وړاندې کړ ترڅو د عدلیې ریاست او د هغوی ترمنځ د همغږۍ د لازیاتې پیاوړتیا سبب شي.
له بلې خوا د معاملاتو لارښوونو دفترونو مسؤولینو هم په دې کتنه کې خپلې ستونزې د عدلیې له رئیس سره شریکې کړې.
