په کندوز ولایت کې د ۴۰۰۰ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د جمادي الاول میاشتې په ۲۶ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې د خان آباد ولسوالۍ په ایشان توپ او زرد کمر ساحو کې د ۴ زره جریبه امارتي ځمکې، د ګل تپې ولسوالۍ په توبره کش ساحه کې د 6 جریبه ځمکې، د امام صاحب ولسوالۍ په باسوس ساحه کې د ۵۷ جریبه ځمکې او د قلعه ذال ولسوالۍ په الم قشلاق ساحه کې د ۳ جریبه امارتي ځمکې دوسیې بحث او بررسۍ لاندې ونیول شوې.
یاد شوي هیئت د خان آباد ولسوالۍ په ایشان توپ او زردکمر ساحو کې ۴ زره جریبه امارتي للمي ځمکه، د هغې په امارتي والي د متصرفینو د اعتراف پر بنسټ استراداد کړه او د هغې د اجارې ورکونې د پړاوونو تېرولو په منظور یې د یادې ولسوالۍ د کرنې مدیریت ته لازمې لارښوونې صادر کړې.
د ګل تپې ولسوالۍ د توبره کش ساحې د ځمکې، د حضرت امام صاحب ولسوالۍ د باسوس ساحې د ځمکې او د قلعه ذال ولسوالۍ د الم قشلاق ساحې د ځمکې دوسیو په تړاو هم لازمې لارښوونې وسپارل شوې.
