په جوزجان ولایت کې څه باندې د ۱۱۰ جریبه امارتي ځمکې تثبیت اوتشخیص
د جوزجان ولایت د ځمکو د غصب د مخنیوي د تخنیکي هیئت ناسته د جمادي الاول میاشتې په ۱۵ نیټې د چهارشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د یاد ولایت د مرکز په اخترخیل او غلام آباد کلیو کې د ۹۱ جریبو ۵ بسوې ځمکې او په نصیرآباد کلي کې د ۱۹ جریبو ۱۲ بسوې نورې ځمکې بشپړ شوی راپور او څېړنې بحث او بررسۍ لاندې ونیول شوې.
په پایله کې، تخنیکي هیئت یادې شوې ځمکې امارتي تثبیت او تشخیص کړې او د هغو راپور یې تایید کړ او د یاد هیئت سکرتریت ته یې دنده وسپارله ترڅو یاد راپور د اړوندو ټولو ضمایمو سره د وروستي تصمیم نیونې په غرض مرکزي کمېسیون ته واستوي.
