په کندز ولایت کې د ۵۷ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته، د ربیع الاول د میاشتې په ۱۶ نېټې د یکشنبې په ورځ د یاد هیئت د رئیس او غړو په حضور سره جوړه شوه د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په یاده ناسته کې، د ګل تپې ولسوالۍ د شادولا عسقلان ساحې د ۵۷ جریبه ځمکې دوسیه بحث او بررسۍ لاندې ونیول شوه او د هغې له غیرشرعي متصرفینو څخه د ځمکې د امارتي توب د اعتراف له اخیستلو څخه وروسته یاده شوې ځمکه استرداد شوه او لارښوونه وشوه چې راپور یې مرکزي کمېسیون ته واستول شي.
په همدې توګه په یاده ناسته کې د حضرت امام صاحب ولسوالۍ په قطربلاق جان ساحې کې د حج او اوقافو ریاست اړوند د ۲۰ جریبه وقفي ځمکې د ملکیت دوسیه چې د استوګنې کورونه پرې ودان شوي، بحث او بررسۍ لاندې ونیول شوه او د هغې د غیرشرعي متصرفینو د اعتراف له ترلاسه کولو څخه وروسته امارتي تثبیت شوه او د څېړنو د بشپړولو او مرکزي کمېسیون ته یې د دوسیې د استولو په منظور لازمې لارښوونې وسپارل شوې.
د کندز ولایت د مرکز د کوته ګرد غیرپلانې د استوګنې ساحې دوسیه چې ۷۰ جریبه ځمکه په کې شامله ده هم په دغې ناسته کې بحث او بررسۍ لاندې ونیول شوه او دغې برخه کې معلوماتي استعلامونه وویشل شول.
