په سرپل ولایت کې څه باندې ۲۶ جریبه ځمکه امارتي تثبیت شوه
د سرپل ولایت د ځمکو د غصب د مخنیوي د تخنیکي هیئت ناسته د محرم الحرام د میاشتې په ۲۲ نېټه د سه شنبې په ورځ د دغه هیئت د رئیس او غړو په حضور سره جوړه شوه او په هغې کې د کهنه بازار په کلي کې د ارشاد، حج او اوقافو ریاست د دوه ټوټې غصب شوې ځمکې په تړاو بحث او د نظرونو تبادله ترسره شوه او د هغې له متصرفینو څخه سندونه وغوښتل شول.
په دغې ناسته کې د مرکز ولسوالۍ په ایګزک کلي کې د پنځو ټوټو غصب شویو ځمکو په اړه هم بحث وشو او تصمیم ونیول شو چې د ساحې د بررسۍ په موخه له هیئت څخه یو ګروپ د چهارشنبې په ورځ ساحې ته روان او سندونه تطبیق کړي او دغه راز د سوزمه قلعه ولسوالۍ د ۳۲ زره جریبه اوبه درلودونکې ځمکې او امارتي څړځای په تړاو د یو شمېر کلیو د اوسیدونکو د عریضې په اړه بحث او د نظرونو تبادله ترسره شوه او تصمیم ونیول شو چې تخنیکي هیئت د سندونو له بشپړولو څخه وروسته ساحې ته سفر وکړي او د دواړو لورو سندونه پر ساحې تطبیق کړي.
په همدې توګه تخنیکي هیئت د سرپل مرکز په میدان طیاره کې د غصب شوې دوه ټوټې امارتي ځمکې په اړه بحث وکړ او لارښوونه یې وکړه چې د هغې سندونه بشپړ شي.
بله ورځ له تخنیکي هیئت څخه یو ګروپ د یاد ولایت د مرکز په کهنه بازار کې د غصب شوې پنځه ټوټې امارتي ځمکې د بررسۍ په موخه ساحې ته روان شو او غصب شوې ساحې یې بررسي او کادستري نقشې پر هغو تطبیق کړې.
یاد شوي هیئت په ایګزک کلي کې ۲.۱۳ جریبه اوبه درلودونکې ځمکه او ۲۴.۴۴ جریبه د څړځای ځمکه له بررسۍ او د کادستري سندونو له تطبیق څخه وروسته امارتي تثبیت کړه او په دغه کلي کې ۳۱ جریبه، ۱۸ بسوې او ۶ بسواسې اوبه درلودونکي ځمکه د دغه هیئت بررسۍ لاندې ده.
