په بلخ ولایت کې څه باندې د ۷ زره جریبه ځمکې دوسیې بررسي شوې
د بلخ ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۲۰ نېټه د یکشنبې په ورځ د دغه هیئت د رئیس او غړو په حضور سره جوړه شوه او په هغې کې څه باندې د ۷ زره جریبه ځمکې دوسیې بررسي شوې.
په دغې ناسته کې د بلخ ولسوالۍ په ورشو کلي کې د یو شخص تر اجارې لاندې د ۱۰۰۰ جریبه امارتي ځمکې راپور تائید او مرکز ته د استولو له پاره چمتو شو او په همدې توګه اړوندو ادارو ته د زورواکو له خوا د غصب شويو امارتي ځمکو د استرداد د لومړیتوب ټاکولو په تړاو لارښوونه وشوه چې ژر تر ژره د غصب شویو امارتي ځمکو د ساحو لست ترتیب او د راتلونکو اجراآتو په غرض دغه هیئت ته واستوي.
دغه راز په یاده ناسته کې د بلخ ولسوالۍ په نوارد بوکه کلي کې د یو شخص تر ادعا لاندې د ۱۸۰۰ جریبه ځمکې په تړاو د یادې ځمکې متصرف ته استعلام ورکړل شو او د چمتال ولسوالۍ په البرز غره کې د ۷۰ منه تخم پاشلو ځمکې د دوسیې په تړاو، له تخنیکي هیئت څخه یو ټیم د بررسۍ په غرض ساحې ته روان شو او دغه راز د خالد ابن ولید پروژې د ۲۷۷۱.۷ جریبه ځمکې راپور تائید او مرکز ته د استولو له پاره چمتو شو.
دغه راز د جوزجان ولایت د قرقین ولسوالۍ د بې ځایه شویو ښارګوټو د ۲۰۰ جریبه ځمکې په تړاو د ۲۳۱ بې ځایه شویو کورنیو استازي ته استعلام ورکړل شو او په کشنده ولسوالۍ کې د دوو اشخاصو تر ادعا لاندې د ۸۰۰ جریبه ځمکې په تړاو له تخنیکي هيئت څخه یو ټیم ساحې ته روان شو او دغه راز د اتیلا پروژې د ۶۵۴ جریبه ځمکې په تړاو پریکړه وشوه چې پر یادې ساحې کار بند او د پروژې له مسؤل څخه د ځمکه والۍ سندونه غوښتل شي.
