د کنړ ولایت د ځمکو د غصب د مخنیوي د تخنیکي هیئت د ناستې جوړیدل
د کنړ ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۱۴ نېټه د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب په تړاو د بېلابېلو موضوعاتو په اړه په کې بحث وشو او دغې برخه کې لازم تصمیمونه ونیول شول.
په همدې توګه له تخنیکي هیئت څخه یو ټیم د دغه ولایت د مرکز د لچیګلي ساحې توحید آباد کلي ته ولاړ او په ۸۲۸، ۸۲۹ او ۸۳۰ شمېرو سره د کادستر درې ټوټې ځمکې په دغې ساحه کې بررسي کړې. یاد شوي هیئت د دغو ټوټو په داخل کې د ۸ ودان شویو کورونو غاصبین، د غصب شویو ځمکو مساحت، کروکي، ډول، د ځمکې او د هغې د ودانیو بیې او حدود يې له تعیین شوي جدول سره سم، تشخیص او تفکیک کړل او د هغو د غاصبینو شهرت یې په جدول کې درج کړ.
