د بامیان ولایت د ځمکو د غصب د مخنیوي د تخنیکي هیئت د ناستې جوړیدل
د بامیان ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۲۲ نېټه د دوشنبې په ورځ د هیئت د رئیس او غړو په حضور سره جوړه شوه.
په یاده ناسته کې د نوین ښارګوټي، اتفاق ښارګوټي او د بامیان ولایت د مرکز جرخشکک د بررسۍ وروستی راپور وړاندې شو او پریکړه وشوه چې د هیئت غړي راپور مطالعه کړي او خپل نظرونه وړاندې کړي ترڅو یاد راپور مرکزي کمېسیون له پاره استولو ته چمتو شي.
دغه راز د تخنیکي هیئت له خوا د ساحو بررسۍ، تثبیت او له تشخیص څخه وروسته په ښارګوټو او بېلابېلو ساحو کې د جوړ شوو کورونو د ویجاړولو په اړه، بحث وشو او پریکړه وشوه چې دغې برخه کې له مرکزي کمېسیون څخه لارښوونه وغوښتل شي.
د بامیان مرکز له جوی سنګ باران فولادي څخه ښکته د څړځای تخریب او ځايي خلکو له خوا په هغو کې د کرکیلې په اړه بحث وشو او پریکړه وشوه چې یاد خلک کولی شي یواځي روان کال کرل شوې ځمکه کې اوبه ولګوي او په هغه صورت کې چې ډېره ځمکه ویجاړه کړي له هغوی سره به قانوني چلند وشي.
په دغې ناسته کې د کهمرد ولسوالۍ د مدر کلي د تاتاریانو عریضه، هم بررسي شوه او پریکړه وشوه چې ټول غرونه امارتي دي او د هیچا ملکیت نه دي، نو ځکه ټول ځايي اوسیدونکي کولی شي له هغو څخه ګټه پورته کړي او که څوک د مالکیت ادعا ولري خپل سندونه دې اړوندو مراجعو ته وړاندې او موضوع تعقیب کړي
