تګاب ولسوالۍ ته د کاپیسا ولایت د ځمکو د غصب د مخنیوي د تخنیکي هیئت سفر
د کاپیسا ولایت د ځمکو د غصب د مخنیوي تخنیکي هیئت د شوال میاشت په ۲۷ نېټه د چهارشنبې په ورځ د یاد ولایت تګاب ولسوالۍ ته ولاړ او د ځمکو د غصب د مخنیوي او د غصب شویو ځمکو د استرداد په برخه کې عملي اقدامات ترسره کړل.
د تګاب ولسوالۍ اوسیدونکو د دغې ولسوالۍ په بېلابېلو برخو کې د ځمکو په غصب او په خپل سر ډول د کورونو او بڼونو جوړلو لاس پورې کړی وو چې وړاندې د یاد هیئت لخوا په ګوته او استرداد له پاره چمتو شوي.
یاد شوي هیئت د سیمه ییزو مسوولینو په همغږۍ کوره خیل سیمې او لنداخیل، جالوخیل، د صلاح کلا او جویبارکلا کلیو ته ولاړ او په دغو ساحو کې ناقانونه تاسیسات ویجاړ کړل او د ساحې پر خلکو یې هم ټینګار وکړ چې د ځمکو له غصب څخه مخنیوی وکړي.
تخنیکي هیئت یادې شوې ساحې استرداد کړې او د ولسوالۍ ځايي مسوولینو ته یې تسلیم کړې ترڅو له بیاځل غصب څخه یې مخنیوی وکړي.
