د دایکندي او ننګرهار ولایتونو د تخنیکي هیئتونو ناستو جوړیدل
د دایکندي او ننګرهار ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او دغو ولایتونو کې د امارتي ځمکو د غصب د مخنیوي په اړه، لازم اقدامات هم ترسره شول.
د دایکندي ولایت د تخنیکي هیئت په ناسته کې په سرنیلي کلي کې د دریو قطعو ځمکو په اړه چې مخکې امارتي تثبیت شوې وې، بحث وشو او د هغې د یوې قطعې په اړه چې د یو شخص د مالکیت تر ادعا لاندې ده پر لا زیاتې څېړنې ټینګار وشو.
دغې ناسته کې، په غونډو کې د غړو ادارو د رییسانو پر حضور او د هغو استازو له معرفي څخه ډډه کول چې له قضیو څخه خبر نه دي، ټینګار وشو.
په همدې توګه یاده ناسته کې د مهاجرینو د آمریت د غصبي املاکو په اړه بحث وشو او ددغه آمریت څخه د با صلاحیته استازي او دوسیې د غوښتلو پریکړه وشوه. هیئت یادې شوې ساحې ته ولاړ او د مهاجرینو د ښارګوټي غصب شوې ساحې یې بررسي کړې او د سروې او بررسۍ ټیمونو ته دغو برخو کې لازمې لارښوونې وشوې.
په همدې حال کې د ننګرهار ولایت د ځمکې د غصب د مخنیوي تخنیکي هیئت د سیاف فامیلیو ساحه کې د زورواکو لخوا یو شمېر جوړ شوي کورونه ویجاړ کړل.
ددغې ځمکې ساحه چې ۲۸۶۱ جریبه ده، مخکې امارتي تثبیت شوې وه.
