د ځمکو د شخړو د حل کمېسیون استول شوي هیئت د سرپل ولایت د عدليې له رییس سره وکتل
د ځمکو د شخړو د حل کمېسیون استول شوي هیئت؛ ولایتونو ته د سفر په لړ کې د ربیع الاول میاشتې په ۸ نېټه د سه شنبې په ورځ سرپل ولایت ته سفر وکړ او د دغه ولایت د عدليې له رییس مفتي کمال الدین فاضل سره يې وکتل.
دغه هیئت د مولوي صدرالدین په مشرۍ ولایتونو ته استول شوی دی او د شخړو په اړه د سندونو او مدارکو په راټولو بوخت دي.
یاد پلاوي د تخنیکي زده کړو د ادارې او د پوهنې ریاست ترمنځ د حقوقي شخړې، د سرپل ولایت او د غور او فاریاب ولایتونو ترمنځ د مرزي شخړو او د سرپل ولایت د مرکز د دوه یمې ناحیې د تفصیلي پلان د پاتې ۳۰۰ نمرو د ویش په اړه د سندونو او مدارکو راټولول؛ دغه ولایت ته د خپل د سفر د موخو په توګه یاد کړل.
دغه راز د سرپل ولایت د عدلیې ریاست د اړونده ادارو استازي را وبلل او د یادو مسایلو په اړه يې له هیئت سره خبرې وکړې او سندونه، معلومات او مدارک يې د هیئت په واک کې ورکړل.
