د مالیې وزارت له پلاوي سره د عدليې وزارت د سرپرست کتنه
![.](/sites/default/files/2022-06/2_n_0.jpg)
د اسلامي امارت د عدليې وزارت د انسجام لوی رئیس او د دې وزارت سرپرست مولوي احسان الله وثیق د ذوالقعدې په ۱۵ نېټه د سه شنبې په ورځ د ماليې وزارت له پلاوي سره د عدليې وزارت په مقر کې وکتل او خبرې یې ورسره وکړې.
په دې کتنه کې دواړو لورو د عدلیې وزارت د عایداتي سرچینو د بررسۍ لپاره د یوې کمېټي د جوړلو په اړه خبرې وکړې.
په دې کتنه کې پرېکړه وشوه چې یاده شوې کمېټه دې د انسجام له لوی ریاست، د رسمي سندونو د تصدیق او ژباړې له ریاست، د حقوقو له لوی ریاست، د مدافعو وکیلانو له ریاست او د احکامو د تنفیذ له ریاست څخه د استازو په ګډون را منځته شي او د مالیې وزارت سره په مرسته او همغږې کې به د عدلیې وزارت عایداتي سرچینې بررسي کړي.
![720](/sites/default/files/inline-images/1_n.jpg)
په همدې ډول کمېټه به جوته کړي چې کومې عایداتې سرچینې فعالې او کومې یې غیرفعالې دي تر څو چې غیر فعالې عایداتې سرچینې بیا فعالې او فعالې سرچینې وده وکړي او نوې عایداتې سرچینې وموندل شي.